懷孕紀錄5.5.2014

母親節快到了，老公問買什麼給我們的媽媽

我：買xxx啦

老公：哦，都好...

我：我呢，想要xyz 呀

老公：點解呢，母親節關你咩事呢？依家講緊買咩俾媽咪啊！

我：咁我都係母親黎wor

老公：......😅

今日去健康院，我問姑娘：點解我呢排到夜晚八九點就斷電呢，係咪要食返啲supplement 呢？

姑娘：其實日常飲食均衡就夠架啦

我：但我覺得散曬，好似俾人搶電咁

姑娘：正常呀，孕婦係咁架啦，你依家三十週架啦，你自己唔知架咩？

我：......😅

真係話咁快，妹妹就出世啦，工人姐姐都到左，但妹妹仲未有名，要睇下書先得啦

是日晚餐，片皮鴨

食譜在此

http://www.christinesrecipes.com/2012/01/mandarin-pancakes.html

用面包機搓粉，乾手淨腳，起初不太順手，曾在中東工作的工人姐姐主動幫忙，加上老公切的皮和肉，同埋我切的青瓜，咪就係好好味之嘛

還有，腳腫了，每晚爸爸都幫媽媽按腳消腫，姑娘話這些都算不上腫了

孕期可用的護膚品 Bio logical

本小姐的孕期只餘下三分之一，近半年本小姐絕大部份時間都素顔，並停用所有果酸類護膚品，改用成分天然無添加的東西，so far so good，但轉天氣之時皮膚變得不穩定，面珠和鼻子泛紅而且洗面時鼻翼刺痛，同時T字位油，重點是，因為BB間歇性半夜打功夫令我眼光光望天光，我深信這是影響皮膚的主因

剛巧收到Bio-Logical的試用，而且知道它的成分天然，就放手一試啦！

先介紹下面膜

My Peace Treaty - Soothing moisturizing mask

My Peace Treaty 舒緩保濕面膜 

成份: 玫瑰花水、摩 洛哥堅果油、 乳木果油、金鏤梅水、玫瑰果油及琉璃苣油等天然植物萃取

 

功效: 超強水潤配方 具深層保濕修護效用, 使肌膚更柔軟明亮。摩洛哥堅果油混合乳油木果脂 和杏仁油，能迅速滋潤角質，高效防止皮膚水分 散失。質感柔滑，不會有油膩感覺。不含人造色素、不作動物測試。

 

使用方法：清潔面部後，敷上一層薄薄的面膜，避開眼部和嘴，靜待 5 – 20 分鐘用清水沖洗乾淨及抹乾。

 

適合皮膚 : 適合所有肌 膚類型，包括敏感皮膚也可使用。

 

售價：HKD350 / 200ml

一大枝，分量十足，是我最喜歡的 cream mask 質地，

孕期色素沉澱嚴重，要遮下，請見諒

面膜塗上面馬上聞到一陣清新的草本味，很令人放鬆，而且很好推開，本小姐敷了30分鐘都沒有乾掉，本來有點刺痛的鼻翼兩旁也得到舒緩，洗走的時候加少少水打圈按摩，過水後泛紅的地方減退了八成，最驚喜的是毛孔收細了，膚色變明亮了，（拉開了面和頸的色差😅）而且皮膚摸上手很軟滑，而且大大枝唔洗就住黎用，保養真係唔慳得架

這面膜成了我孕期大愛呢，我最喜歡晚上用，它的氣味實在太舒服，每次用它都可以一覺瞓到大天光，教我如何不愛它呢！

 

要keep住面膜的效果之後查面霜是必需的。我會用埋它家的晚霜

 

My Beauty Sleep - Precious night cream

My Beauty Sleep 修護晚霜 

成份 : 刺梨種子油、摩洛哥堅果油、澳洲堅果油、琉璃苣油、乳木果油及亞麻籽油等天然植物萃取

 

功效 : 在夜間滲透肌膚深層，強效滋潤補水，同時封住肌膚，預防水分蒸發，為下一個早晨準備好保濕、柔潤又光滑明亮 的肌膚。24 小時持續保濕。

 

使用方法：晚間潔面後，取適量途於面及頸部。適合每晚使用。

 

售價：HKD350 ／ 50ml

成分好天然，我通常用兩泵的份量連頸一起查，孕期的頸紋變本加厲了，要勤力保養。

它的氣味和mask 不同，是杏仁果仁類的味道，質地滋潤，臨睡時用，覺得有點痴立立，但第二朝起床時竟然額頭鼻子都無出油，觸感仍是敷完mask 時一般！呢個效果絕對喜出望外！

Bio Logical 的産品依家去呢度有得買啦

 http://fingershopping.com/

 購物超方便，啱曬我呢啲出街一陣就攰的大肚婆呢

麵包機整蛋糕--柚子蜜蛋糕

上星期去飲糖水驗血糖，到依家未收到電話，正所謂無消息就是好消息，就暫時俾我放縱下啦

之前用面包機整法包，效果和長法包九成似，證明panasonic 的面包機真有實力，今次就試下佢蛋糕模式

食譜和磅蛋糕類近，效果是牛油蛋糕的質感，牛油要落好多，真係間中食下好啦

材料：

牛油  100g

糖100g

低筋粉 100g

糖 100g 

柚子蜜 1大匙

今次用左柚子蜜，焗的時候成間屋都好香呢，因為柚子蜜是濕的我就無再落奶，但可能因為咁個cake好快就唔夠濕潤，下次都係落返少少奶先

用清文 27.4.2014

BB 仲有兩個幾月就出世，要騰出空間放BB嘢，就要加快速度將存貨清空

我都知冇可能兩個月內用曬啦，盡力啦，用幾多就po幾多出黎

寶藝這個冷膜在巴黎草莓買的，是細罐裝，唔知點解打開時只有三分二的容量

夏天用涼涼的很不錯，用後明顯膚色變明亮，黑頭會軟化變得易清理

缺點是訂價比Annie's way的涷膜高而且購買方法也沒那麼方便

兩者效用差不多所以回購率不高

Eminence 的益生菌洗面奶和檸檬洗面奶是不同質感的，這個會起少量泡，而且洗面時涼涼的，對又紅又腫的石頭瘡有舒緩作用，我通常配合clarisonic 來用，洗感不乾，但因為用感比較涼，冬天幾乎放著不用，到拿出來用時好像有點變質，因為不便宜我就沒有用來洗面，但用來洗身效果不錯，對背脊的粒粒有消炎作用，現在手頭上仲有幾枝洗面，暫時不會回購

就這樣，短期目標就是努力清空^_^

懷孕紀錄26.4.2014

心情，低落。

強烈認知道，你的出現，意味著我必需放棄过去賺錢買花帶的日子。

懷孕後婆婆主力照顧媽媽，爸爸對媽媽生理和心理沒有太大認知

媽媽無把握獨力坐月同時照顧力，和爸爸商量請工人，同時找個陪月姨姨幫媽媽養好身子，但爸爸起初否決了，因為嫲嫲會幫忙

但，媽媽覺得，要長輩照顧自己不是一件妥當的方案，畢竟她已將爸爸和叔叔撫養成人，她再也無責任去照顧我們，況且她已到了享福的年紀，媽媽實在覺得不忍心，而且媽媽也有心理準備坐月期間情緒會變得不穩定，媽媽不想到時會讓人難堪，尤其是你嫲嫲

但爸爸到現在還未了解到這點

即使現在人手上已作出安排，但爸爸仍覺得這些措施純粹為了安撫媽媽

這使媽媽在為親友辦嫁妝時，卻高興不起來。

我自問我的要求並不是為了自己，也知道花的錢不少，但當看見別人為了婚事買東西毫不吝嗇時，我卻連最基本的要求也要拉下臉皮去爭取。

因為這樣，我傷心，我委屈，但爸爸到現在還覺得是媽媽看不得別人買名牌

媽媽有眼紅，為什麼別人有的我沒有，為什麼當我表達我的無力和不安時我得到的回應是無言和黑面。

因為這個，媽媽哭了兩天

容許媽媽現在的懦弱，媽媽在學習堅強

昨天媽媽去做第二次耐糖測試

希望無事吧

你越來越重了，媽媽感覺你的郁動越來越實在，好幾次仲有D痛tim

下個月我地去影全家福，你要乖啊

懷孕紀錄16.4.2014

妹妹，你已經27週大了

好大個啦！

爸爸成日都好想同你玩，每天上班前，下班後，臨睡前，都要捽下你，等你有反應先安樂，因為咁成日都搞到你無得休息，但爸爸實在太想同你玩了，等你出世你一定會認得呢個成日搞醒你的人

你越來越重了，媽咪的動作越來越遲鈍了，連去超市買少少野都見暈，為了生你時可以快點順利點，媽媽呢兩個星期都有去游水，今日仲會去做瑜珈，要知道，媽咪平時好少做運動的

你越來越大力，有時會踢到媽咪個肚好似跳肚皮舞咁，有時候同你講嘢都會有反應，媽媽亦大概掌握到你的作息時間，媽媽每次用餐後你都會變得好活躍，媽咪有理由相信你會是個為食妹

呢張high chair 是媽媽幫你㨂的，喜歡嗎，遲些床仔就會送來了

下個月媽咪和爸爸就會去學湊B，希望你來時我們不會太騰雞

媽咪和爸爸都開始幫你改名，對媽媽來說，名是我們對你的期望，媽媽只想你能隨心，快樂，你的名字會以這兩個大方向去想，其他風水命理的因素都不會在考慮之內，正所謂人算不如天算，再神機妙算也不過如是，對嗎

就這樣，下次再說

無油的合桃吐司

又用了預設模式去整包

之但係，包包出爐比之前矮好多，只係同个焗盤一樣高，平時係升到上頂的

但個皮係脆的，加埋合桃好香口，夾餐蛋就成為賣飛彿啦

不過呢個包唔襟擺，到下午就乾硬化了，第二朝用來做西多士就 perfect  

問題係，搞左好耐先倒到出來

材料

高筋粉  230g 

麥皮     20g

鹽。     3g

糖。     10g

酵母。  2g

合桃。  適量

 

軟面包模式。淡烤色。提子乾without sound

懷孕後的第一次下廚

老公返工，終於到我揸鑊鏟

本小姐很享受煮飯仔的樂趣，也為食，自己煮絕對合。味。道

這天買了部新玩具給自己，回家就做煮飯婆啦

做大肚的無業師奶要有貢獻是常識吧

不過體力真的大不如前，切下又要坐下抖抖

懷孕後第一煮，南瓜燘排骨

平時對南瓜無太大好感的朱先生，今次專挑南瓜吃

好魚不在於名貴與否，新鮮就得，忘了買咸檸檬，就咁用薑，魚雖大但魚油不多

這個我最喜歡，西芹甘筍素雞+魔芋，非常清新

我淨係識呢啲咋

美容院的新奇事--所有treatment plan 都唔用得

懷孕後一直都無去做facial，因為好多步驟都不能做，機唔做得，肩頸唔按得，按面只可以細細力，到喉唔到肺

到依家先再去啦，因怕生完後要照顧bb無空間去啦

因平時去開的美容院我有body和facial plan ，咁我打電話預約時就話我想做body，有咩treatment我本身有依家做得，因我依家無做嘢，唔想再俾幾千蚊再買多個plan

因這間美容院一直做得不錯，而且是媽媽的朋友開的，老闆娘就可以彈性處理，ok，咁我就上去啦

上到去，boby師叫我買枝油防肚紋，咁我枝肚紋膏就用完，就買啦，之後佢地用我買枝油黎幫我做，我都無異議，因為我對油的認知係屬於襟用型

我在這間美容院裡有幾萬元的 plan ，因為我知道它家的價位 mark up得尚算公道，用靚料，而且是自置物，不怕走數，地方夠大又舒適，可以同時做body 和facial，俗一點講，可以起雙飛，不用騰來騰去

但普遍美容院hard sell 的問題，這裡還是會有的

會覺得煩，但做生意就是這樣

講返今次做treatment， 同時間房內有一個美容師，一個body師，仲有一個consultant，期間大家都好好傾，但入到戲肉，就話我扣之前的treatment 唔抵啦，我請consultant幫我計下，佢篤下計算機又話新plan幾抵，當我話，咁好吖，我買10parts 啦（大約千零蚊），點知佢又話，咁少唔係呢個價wor...

其實係呢度做treatment係好舒服，所以我都好心動，但一買就要40part，要五千幾，我七月就生得一定用唔曬

就咁，我只係帶左枝肚紋油返屋企（折後500幾）比專門店平

之但係，見唔見到枝油少左一截呢

因為佢地拆左枝油黎幫我豪按呀...一次就KO左我三分一枝

即係用我枝油，又扣我treatmemt

真係蝕晒啦

懷孕紀錄31.3.2014 乳酪密密吃

踏入第26週了

真正感受到朱妹妹的重量和力量

妹妹會係媽咪肚入面打功夫，試過好幾次搞到媽咪無覺好瞓

因為身型暴脹，之前重得太快，所以燉品補品這些東西我幾乎沒吃過，只吃有營養的fresh food

早餐是牛奶麥皮，生果每天吃兩種，雞蛋每日一隻

懷孕期間下體分泌增加，間中帶有一點異味，除了保持衞生勤清洗換內褲外，本小姐發覺吃了乳酪情況大有改善，而且去大大都順暢好多架

之前一直在吃這個

不過最近加價到$9一杯，便沒有再買，索性自已整啦，自己整仲可以減糖，又不會有添加物

材料：

純味乳酪 3大匙

糖（我用三温糖）2大匙

牛奶 500 ml，建議用全脂奶，成品會較濃稠，脫脂和低脂做出來會奶水分離，而且沒有用全脂奶般幼滑

做法，將牛奶叮至温熱，加入糖和乳酪和糖，靜置温暖地方約4-8小時，或待mixture變杰身後放進雪櫃，可放不超過五天

發酵期間我會將mixture在熱水中座暖，可加快發酵速度而且容易成功

早餐加入你喜歡的乾果或水果，就係營養早餐啦

今天出去走走，買了個小東西給朱妹妹

媽咪揀左好耐架!!!